Tuesday, October 05, 2010

في ألمانيا train بال



 قاعده بال ترين بعد ما امي خلتنا نغير محلنا زي ألف مرة عشان هون ما بنشوف اشي وهون في صوت المحرك و هون قراب عالحمام فأخيرا قعدنا ورا بعض ومش قبال بعض على طاولة .المهم ، قاعده أنا وقبالي كابل شكلهم أكبر من مراهقين بشوي ، يمكن24 ، 22



قاعدين على كرسيين جنب بعض وممددين اجريهم على الكراسي اللي قبالهم ، بالزبط زي المحل اللي امي كان بـدها نقعد فيه.


الشاب كتكوت وطويل ، يعني الماني شو بدو يكون! وهي مش كتير حلوه ، كان بقدر يلاقي أحسن! هيك نحنا العرب بنحكم عالناس بالمظاهر وزي كإنه بنستخسر بالشباب البنات اللي مش كتير حلوين كإنه الجمال كل اشي.


قاعد هو جنب الشباك وهي الكرسي اللي جنبه. هو ماسك مجله بيقرأ مقالة – عن الهندسه المعماريه شكله- وهي ماسكه ناشونال جيوغرافيك . إه! بيعملوها بالالماني


ابصر ايمتى يعملوها بالعربي ؟ بس يصير الشعب العربي يعرف عن ناشونال جيوغرافيك ولا بس يصيرو يقرأوا؟


كتير اطلعت عليهم وعادي مش فارقة معهم ، لو بعمان كان زمان جحرتني وهو كان زمان لاحظني !بس كمان ليش يفرق معهم ؟ مش عاملين اشي غلط .قاعدين كل واحد بيقرا بمجلته يعني الطريق طويلة يستفيدوا شوي بدل ما ياكلوا أو ينزلو دحيه مثلا؟
 
حط ايدو على كتفها، مسكت ايدو ، ابصر شو نوع الكريم اللي بتحطه! ولا يمكن مابيهمها إذا حس انه مش كتير جلدها ناعم ، العلاقة أكبر من ريحة كريم أو نعومة بشرة .


أنا قاعده وحاطة ال اي بود ولابسه تنورة وتحتها تايت موضه مش كتير بيقدروها بعمان . ولساتني عم بتطلع . امي من قدام لصاحبتها "شوفي الناس هون ولا هاممهم “ ضحكت .


.....


يعني معقول أنا عم بلعب سودوكو و هدول قاعدين بعيشوا حياتهم بدون تعقيدات؟ طب عادي ايش المشكلة ؟ المشكلة انه قعده جنب بعض و إيد عالكتف بغ ديل عنا . ماعم بحكي عن المجتمع والحفرتل وعادي كت ومش كت ، عم بحكي انه هذا الشعور ال كوزي مع صاحب ماعشته كل اللي عشته قصص ودراما وبنقدر نكون مع بعض ولا ما بنقدر ، ناخد بريك وبعد البريك وقبل البريك وهدايا ومسجات وال اكس . ولساتني بتطلع …..


بتطلع على الخزق اللي عاملته بحاجبها، يعني بحب الخزوق بس مش عارفه ازا ممكن اعمل على حواجبي. شعرها بني ولابسه كندرة حفرتليه بيضة بس تقاطيع وجها ناعمه .


شعره حلو زي ما دايما بنتخيل الألمان ,طويل ومرتب ، حتى حواجبه حلوين! ايديه كمان حلوين. كيف دايما الالمان مرتبين . لابس جاكيت كحلي أوه بنطلون جينز.


ابصر إذا لسة بدرسوا ولا بيشتغلوا.


ابصر كيف التقوا؟ ابصر إذا اهلها شافوها بتقعد غير ؟ ولا الموضوع مش هيك؟


يبصر إذا أهلها بيحبوه !


اظن لازم يضربني قد مااطلعت !


........


ضحكوا على اشي بدون مايطلعوا على بعض .مع الوقت اظن بصيروا يفهموا على بعض .


زهقت ، ضبت المجلة ونامت على حضنه. لازم أكون متجوزه عشان اقدر اعمل هيك بـعمان قدام الناس والا بكون قليلة أدب وأهلي ماعرفوا يربوني !


طب إذا أنا اللي بسافر وبروح وباجي بتطلع كيف الناس التانية؟ اظن اني معذورة عشاني عربية!


عشان عندي قيم وعشاني اخترعت الصفر. عشاني بحب الفلكلور والمناقيش وصلة الرحم والكرم والشهامة ويوم الجمعة. عشاني عربية بطبعي محافظة وبصون العادات والتقاليد .بحب اللباس المحتشم والمنسف!عشان العرب هم اللي فتحوا الأندلس وبنوا الأهرامات وألفوا موسيقى أم كلثوم وفيروز اللي جاي من باريس الشرق.


عشاني عربية مش مقبول اني أعيش لحالي مش بس أعيش مع صاحبي! مش مقبول انه حتى إذا عشت مع زوجي أقرر أطلقه. عشاني عربية ماكله هوا لما بدي آخذ فيزا على أي بلد وبتشنطت عشان آخذ شينغن . قال لازم دعوة ، بيخافوا آجي على البلد وأنا بسن 27 ومش متجوزة وأصفي قاعدة وبـدور على شغل ومش قابلة أرجع. بيخافوا انه يمكن أكون عالة على المجتمع وأعمل مشاكل لأني طبعا عربية . عربية ومن الأردن وطالبة شينغن تبدأ من 9/11 . يعني معقولة أنا التانيه مالقيت تاريخ غير 9/11 ؟! بيخافوا التم على اكمن عربي هناك واصير من الجالية العربية اللي مش عارفين كيف يخلصوا منها. أو بيخافوا مثلا اضايق الناس وأسبب ازعاجات….. 


بصراحة معهم حق! هيني هلكت اللي قبالي وأنا ببحلق فيهم وبتسائل عن أحوالهم وأفكارهم وأهلهم ومن وين جاكيتاتهم. معهم حق!


بس برضو لازم يعذروني، أنا عربية

P.S. A few days ago National Geographic Magazine is launched in Arabic :)